(1) Die Fra die lebt in Angscht und Sorge,
Ihr Rind soll kalbe heit oder morge.
Sie geht au St. Wendelin und klagt ihm ihre Not:
Oh du heiliger Wendelinus du hilfs mir doch.
(2) Ich bin doch schu oft bei dir angekehrt
Und ich heb dich schu immer ganz besonders verehrt.
Und jetzt in meiner Not, jetzt denk do dro
Uff e- scheene Kerz, wanns gut geht, kummt mor's a net a.
(3) St. Wendelin der lächelt ganz verklärt,
Oh den Vers den hewi schu so oft gehört,
Mor hot Mitleid, mor hilft, mor dut was ma kann,
Und wann's vorbei isch, un isch gut gange, no denke sie nimmie an
ahm.
(4) Doch St. Wendelin der besinnt sich net lang'
Die Fra isch em schu länger bekannt.
Er weiß des isch ohnie driwe vom kerrlocher Sand,
Do wohe jo die ärmste Schlucker vom ganze Land.
(5) Un er secht zu der Fra: sei doch net so bang,
heb doch Vertraue Mu mir dei Lewe lang.
Un jetzt sei ä kloi bissel uf de Hut
Un ich sagt dor's, un ich versprech dor's dei Rind mecht gut.
(6) Die Fra geht froh un getrestet ham.
Un wie sie in Stall guckt, fängt's Rind schu zu trepple a'.
Oh du heiliger Wendelinus, des geht aber schnell,
Awer gleich wäre a' paar beherzte Männer zur Stell'.
(7) Was soll isch jetzt viel üwer des Weitere sage.
Die Fra isch zu friede, sie hot nichts zu klage.
Sie hot ä sche Kalb verkaft, sie hot Milich zu messe.
Awer ons isch zu bedaure, der Wendelin war vergesse.
(8) Halt! Halt! Doch enere scheene Maienacht,
Isch der Fra des Gewisse wieder ufgewacht,
Es war zwar lange Woche schon!
Un ich glab es war in Hambrücke in der Kron?
(9) Unsere Delegierte vom Kreisverbandstag sind dort- wie sich's
gehört,
Uf em Hamweg noch ä Bissel agekehrt.
Sie wollte dort - un des war auch gebote -
Sich von den Strapaze der Tagung ä Bissei erhole.
(10) Uf oimol kummt dere Fra ihre Verschpreche in de Sinn'
Ihr Leit isch muß heit noch zum St.Wendelin.
Sie frägt, sie bettelt, sie bitt' un fleht:
Oh ihr geht doch mit mor unn zeigt mor de Weg.
(11) Die Männer erkläre sich bereit.
Was dut mor net alles for so armes Weib.
Un auf geht's dann mit frohem Sinn,
Zur Wallfahrt nach St.Wendelin.
(12) In de Geographie sen sie awer schlecht bekannt.
Un sen dann auch glatt bei Ubstadt geland'.
Sie wäre awer desweg net verdrießlich,
Sie häwe g'sunge wie die Lerche, wie's auf de Wallfahrt isch
ieblich.
(13) Bei dä Fahrt durch dä Wald do frowe sie en Mann:
He sag mol Vetter wu sen mor dann?
Gwä ou weih tönts von wie so wie,
Erfahre hewe sie nichts es war en Ami.
(14) Nach langer Fahrt käme sie dann,
Spät abends bei St. Wendelin an.
Die Männer die sage: jetzt hemmers awer g'schafft.
Doch iewer die Antwort wäre sie arig iewerrascht.
(15) Die Fra isch verboßt, sie schelt un räsoniert,
Ihr Schlingel het mich mit Absicht en der Welt rumgeführt.
Des wer isch euch nie vergesse ganz,
Un jetzt geht ihr roi un bet' mit mir den Wendelinusrosenkranz.
(16) Dene Männer wird's jetzt Angscht un Bang.
Awer sie folge, sie gehne roi un nemme Platz en dä Bank.
Do knie sie newe nanner un jeder bet't un fleht,
Un alles numme, daß dere Fra gut geht.
(17) St. Wendelin der hört sich die Sach' so a'.
Un wie sie fertig sen, fängt er zu schpreche a':
Er frägt zunächst ganz leis un lind:
Nu sag mol Prä wie isch's dann gange mim Rind?
(18) Oh Wendelin isch heb net s G'ringste ze klage
Isch kann iewer die Sach nur Gutes sage.
Des Rind hot gut g'macht, des Kalb war schee,
Viel Milich git's a, was will mor noch me'
(19) So, so des freit mi' was jetzt vernumme
Awer het mor do net beim Tag kenne kumme?
Oh des Hei un die Dickriewe, de Duwak un die Gorge
Die mache om halt a viel Sorge.
(20) Ja Fra mor dut jo alles vor des liewe Vieh,
Awer die Kerz wu'd verschproche, wu bleibt dann die?
Oh Wendelin heb Geduld die Kerz kummt noch dra'
Isch kumm doch jetzt vun Hambrüke un net vun dehom
(21) St. Wendelin lenkt awer noch emol oi.
Hört! ä' bissei schtawisch scheint ihr mor a zu soi.
Awer for des hewi Verschtändnis, un des glab isch,
Wenn's solang nimmie g'räert hot sen alle Schtroße schtawisch.
(22) St. Wendelin megt awer a zur Ruh'.
Es falle ihm beinoh' die Awe zu.
Un er secht zu dene Leit, geht jetzt hom en eiern Sand
Gebt awer acht, daß ihr nett heitnacht noch en Reilinge' land't.
(Verfasser und Anlass unbekannt; Hinweise bitte per Mail an:
Roland.Liebl@gmx.de)
